काठमाडौं, असार १० — फिफा विश्वकप २०२६ अन्तर्गत समूह ‘के’ मा पोर्चुगलले उज्वेकिस्तानमाथि एकतर्फी दबाब कायम गर्दै ५–० को प्रभावशाली जित निकालेको छ। अमेरिकाको ह्युस्टनस्थित एनआरजी स्टेडियममा सम्पन्न खेलमा कप्तान क्रिस्टियानो रोनाल्डोले दुई गोल गर्दै इतिहास रचेका छन्।
खेलको सुरुवातदेखि नै आक्रामक देखिएको पोर्चुगलले छैटौं मिनेटमा रोनाल्डोको गोलमार्फत अग्रता लिएको थियो। जोआओ कान्सेलोको पासमा रोनाल्डोले सहज फिनिस गर्दै टोलीलाई १–० को अग्रता दिलाए। यो गोलसँगै रोनाल्डो विश्वकपका छ फरक संस्करणमा गोल गर्ने विश्वकै पहिलो खेलाडी बने।
त्यसपछि १६औं मिनेटमा नुनो मेन्डेसले आकर्षक फ्रिकिक गोल गर्दै पोर्चुगलको अग्रता दोब्बर बनाए। खेलको पहिलो हाफमै रोनाल्डोले अर्को गोल थप्दै पोर्चुगललाई ३–० को बलियो अवस्थामा पुर्याए।
दोस्रो हाफमा पनि पोर्चुगलको दबाब कायम रह्यो। ६६औं मिनेटतिर ब्रुनो फर्नान्डेसको कर्नर प्रहार क्लियर गर्ने क्रममा उज्वेकिस्तानका डिफेन्डर अब्दुकोदिर खुसानोभबाट आत्मघाती गोल हुन पुग्यो र स्कोर ४–० बन्यो। खेलको ८८औं मिनेटमा राफाएल लेआओले उत्कृष्ट व्यक्तिगत प्रयासमा गोल गर्दै पोर्चुगलको जितलाई ५–० मा पुर्याए।
उज्वेकिस्तानले केही अवसर सिर्जना गरे पनि पोर्चुगलको संगठित रक्षापंक्तिलाई भेद्न सकेन। एकपटक बल जाली चुमे पनि भिडियो सहायक रेफ्री (VAR) ले फाउल देखाउँदै उक्त गोललाई मान्यता दिएको थिएन।
यस जितसँगै पोर्चुगलले समूह चरणबाट नकआउट यात्रातर्फ महत्वपूर्ण कदम चालेको छ। विशेषगरी ४१ वर्षीय रोनाल्डोको ऐतिहासिक प्रदर्शनले पोर्चुगललाई आत्मविश्वास दिलाएको छ भने विश्व फुटबलमा उनको प्रभाव अझै कायम रहेको सन्देश दिएको छ।
